Laguntza-neurriak behar sozial bati emandako erantzuna dira, eta babes pertsonala eta ondarezkoa bermatzen diete narriadura kognitiboa, gaixotasuna edo arrisku-egoera dela-eta modu autonomoan jarduteko gaitasuna galdua duten pertsonei.
Hurkoan, aholku ematen diegu informazioa eta orientazioa bilatzen duten familiei, eta, aldi berean, babes eta ongizate handiagoa bermatzen diegu laguntza jasotzen duten pertsonei.
- Balorazio integrala egitea.
- Gaitasuna aldatzeko prozeduraren jarraipena egitea hala behar duten pertsonei.
- Familiei aholkuak ematea gaitasuna aldatzeko prozedura izapidetzeari eta laguntza-neurriak baliatzeari buruz.
- Profesionalei informazioa eta orientazioa ematea.
- Laguntza-neurriak eskaintzea gaitasuna legez aldatua duten pertsonei, horretaz arduratzeko senitarteko edo erakunderik ez badute.
- Laguntza-neurriak jasotzen dituzten pertsonak zaintzea eta babestea, eta haien ondasunak administratzea, haien gaitasuna aldatzen duen epaiaren irismenaren arabera.
- Lagundutako pertsona ordezkatzea, epaiaren mugen barruan.
- Kuradoretzapean dagoen pertsonari erabakiak hartzen laguntzea.
- Bizi-kalitate ona bermatzeko behar beste gizarte- eta osasun-zerbitzu publiko eta/edo pribatu kudeatzea.
- Familiari laguntza ematea eta segimendu pertsonalizatua egitea.
Lege-erreformak hiru neurri mota aurreikusten ditu: borondatezkoak, informalak eta judizialak.
Borondatezko neurriak
- Orainaldiko neurriak, aldebakarrekoak (orainaldiko botereak) edo aldebikoak (laguntza-akordioak) .
- Prebentziokoak edo etorkizunekoak: bereziki, prebentzioko botereak edo mandatuak.
- Elikagai-kontratuak eta asistentzia-eginkizuna duten antzeko beste batzuk.
- Osasuna zaintzeko botereak eta aurretiazko borondateak.
Neurri informala edo legala: egitezko zaintza.
- Egoerarik ohikoena da, eta, normalean, familia-zirkuluan edo gizarte-ingurunean garatzen da. Oro har ez da ordezkatzailea, eta babesa ezartzen da.
- Horrekin batera, har daitezke beste neurri batzuk ere, hala nola kuradoretza edo defendatzaile judiziala.
Neurri judizialak
- Kuratela. Normalean, asistentziarako eta salbuespen gisa bakarrik ezartzen da, behar den babesa emanda.
- Defendatzaile judiziala. Laguntza jasotzeko eskubidea bermatzeko figura, desgaitasuna duen pertsonak erabakiak hartzean ordezkapenak egiteko kasuen gehienezko murrizketarekin.
Hurkoak ematen dituen laguntza-neurrien hartzaile diren pertsona askoren profila hau da: adinekoa, bakarrik dagoena, egoitza batean bizi dena, eta oinarrizko beharrak beteta dauzkana baina ondarea kudeatuko dion norbait behar duena, baldin eta ondarerik badu, edo beste beharrizan batzuei erantzuteko norbait behar duena. Beste zenbait kasutan, adinekoa egoitza batean bizi da eta ez dago bakarrik, baina senideak ez dira ados jartzen haren zaintzari edo ondasunen kudeaketari dagokionez. Hurkoara bideratzen diren eta gaixotasun mentalen bat duten pertsonen kasuan, egoerak askotarikoagoak dira.
Familientzako zerbitzuari dagokionez, kontsulta gehienak narriadura kongnitiboa duten adineko pertsonekin lotuta daude, eta legezko ordezkaritza baliatzea dakarren kudeaketaren bat egiteko jotzen dute Hurkoara. Ohikoak dira kasu hauek ere: familian desadostasunak izatea desgaitasuna duen pertsonari arreta emateko moduari buruz, haren zaintzarekin lotutako kudeaketak egiteko moduari buruz, haren ondasunak kudeatzeko moduari buruz, eta abar.
Beste egoera-tipologia bat hau da: buruko gaixotasuna duen seme edo alaba baten gurasoak, gaixotasun horren kontrako borrokan bide luzea egina dutenak baina, une jakin batean, laguntza-neurrietara jotzen dutenak egoeraren zailtasuna arintzen laguntzeko irtenbide bat bilatu nahian.