Hurkoa Fundazioak Arizmendiarrieta Sariak Gipuzkoa 2026 saria jaso du irabazi-asmorik gabeko erakundeen kategorian. Sari honek pertsonak erdigunean jartzen dituzten kudeaketa-ereduak aitortzen ditu, eta bereziki balioesten ditu parte-hartzea, etika, gardentasuna, gizarte-konpromisoa eta giza garapena sustatzen dituzten erakundeen jardunak.

Sari-banaketa ekainaren 15ean egin zen Donostiako Deustuko Unibertsitatean, Arizmendiarrieta Kristau Fundazioak eta Euskadiko Zuzendari eta Profesionalen Elkarteak (Adype) antolatutako ekitaldian. Bertan, Gipuzkoako erakunde, enpresa eta gizarte-eragileetako ordezkari ugari bildu ziren.

Aurtengo edizioan, Bellota Herramientas enpresa-kategorian eta BioGipuzkoa Osasun Ikerketarako Institutua sozietate publikoen kategorian ere saritu dituzte.

Hurkoaren izenean, Marta Álvarez de Arcaya presidenteak jaso zuen saria. Bere hitzaldian, aitortza hau Hurkoa osatzen duten pertsona guztiekin partekatu nahi izan zuen: profesionalekin, boluntarioekin, erabiltzaileekin, senideekin, patronatuko kideekin eta erakunde laguntzaileekin. Izan ere, guztien konpromisoari eta eguneroko lanari esker egiten da posible Fundazioaren jarduera.

Era berean, Bellota Herramientas eta BioGipuzkoa zoriondu zituen, gizartean eragin positiboa sortzeko egiten duten ekarpena azpimarratuz.

1990ean Gipuzkoako Caritasek sortua, Hurkoa Fundazioak zaurgarritasun-, mendekotasun- edo babesgabetasun-egoeran dauden adineko pertsonen eta buru-gaixotasuna duten pertsonen eskubideak zaindu, babestu eta defendatzeko lan egiten du.

Epaimahaiak bereziki nabarmendu ditu Hurkoaren kudeaketa-eredu parte-hartzailea, kalitatearekiko eta gardentasunarekiko duen konpromisoa, etika profesionala, legezkotasunaren betetzea eta genero-berdintasunaren aldeko apustua. Halaber, komunitateari eskaintzen dion zerbitzua justizian, inklusioan eta aniztasunarekiko errespetuan oinarrituta garatzen duela azpimarratu du.

Hurkoan esker onez eta hunkituta jaso dugu aitortza hau. Sari honek bultzada berria ematen digu pertsonen eskubideak defendatzen, haien autonomia eta ongizatea sustatzen eta gizarte bidezkoago, inklusiboago eta solidarioago baten alde lanean jarraitzeko.

Aitortza hau Hurkoa egunero posible egiten duten pertsona guztiena da. Profesionalen, boluntarioen, erabiltzaileen, senideen, patronatuko kideen eta erakunde laguntzaileen konpromisoaren emaitza da, eta hiru hamarkadatik gorako ibilbide sozialaren balioa aitortzen du.