Memoria deskargatu

Hurkoak 2025eko Memoria argitaratu du. Bertan, Fundazioarentzat bereziki esanguratsua izan den urteko proiektu, jarduera eta gertakari nagusiak bildu ditu, 35. urteurrenaren ospakizunarekin bat eginez.

Memoriak Hurkoak bere jarduera-eremuetan egunero egiten duen lana islatzen du. 2025ean, laguntza-neurrien zerbitzuak 614 pertsona artatu zituen, haien erabakiak hartzen eta eguneroko bizitzako hainbat alderdi kudeatzen lagunduz, betiere haien borondatea, lehentasunak eta autonomia errespetatuta.

Familien Zerbitzuak, bestalde, Gipuzkoako 219 familia artatu zituen. Horietatik 162k orientazioa eta aholkularitza jaso zuten, eta beste 57ri prozedura judizialetan lagundu zitzaien. Lan horri esker, Hurkoak urteetan pilatutako esperientzia familien eskura jarri eta egoera bereziki konplexuei aurre egiteko laguntza eskaintzen die.

Memoriak Andre Maria Mesedetakoaren Eguneko Zentroaren jarduera ere jasotzen du. Zentroak 80 pertsona artatu zituen lanegunetan, eta 39 pertsona asteburu eta jaiegunetan. Erabiltzaileen batez besteko adina 86 urtekoa izan zen, eta gehienek mendekotasun larria edo mendekotasun handia zuten.

Nabarmentzen den beste jarduera-eremuetako bat Hauskortasuna da, hauskortasuna prebenitzeko eta artatzeko zerbitzua. Horren bidez, 62 pertsonari lagundu zitzaien urtean zehar. Lan horrekin batera, 74 boluntarioren inplikazioa eta 71 profesionalek osatutako lantaldearen konpromisoa azpimarratzen dira.

Jardueraren datu nagusiak aurkezteaz gain, argitalpenak aurpegia jartzen dio Hurkoaren lanari, boluntariotzarekin, eguneko zentroarekin, laguntza-neurriekin, familiei emandako babesarekin eta Elkarrekin Bidaia bezalako programekin lotutako elkarrizketa, testigantza eta esperientzien bidez.

2025eko Memoriak Hurkoak 1990ean sortu zenetik egindako 35 urteko ibilbidea ere gogora ekartzen du, baita gizartean eta esparru juridikoan izandako aldaketetara egokitzeko erakundeak izan duen bilakaera ere. Historia hori pertsonan oinarritutako arretaren, sare-lanaren eta konpromisoaren gainean eraiki da, beren bizi-proiektua garatzeko laguntza behar duten pertsonekin batera.

Argitalpenak, azken batean, 2025ean egindako lanaren ikuspegi orokorra eskaintzen du eta, aldi berean, gizartean sortzen ari diren behar berriei erantzuten jarraitzeko gonbita egiten du, betiere pertsona bakoitza, haren eskubideak eta duintasuna erdigunean jarrita.